بعد ايام العباسية المريرة والتجربة الفشيخة اللى مريت بيها اينعم لمدة أيام حالتى النفسية كانت فى الحضيض لكن مش احباط...وبرغم انى كنت بتعامل على انى عدو الوطن اللى فى فيلم البرئ مش من المجندين لا من الشعب المصرى ...فى الميكروباص والشارع وعلى القهوة...القصد وبقدر الامكان تعديت المحنة دى ما انا بقالى سنة ونص متبهدل شتيمة واتهامات لحد ما جتتى نحست...ومش انا لوحدى المجموعة الشابة الثورية ....الا اننا فى العزيمة مختلفين شوية...فى واحد يحبط فكل حواسه الثورية وافكاره ومبادرته تتجمد وتدبل ثم تموت ويقول ماليش دعوة...وشاب أخر يتقمس شخصية عبد الناصر بعد النكسة ويطلع يكتب على الفيس بوك انه يتنحى عن اى معرفش ايه ليعود فين ومن الاخر مش هيكون ثورى ويبيع القضية والثالث وهو انا مثلا لا اصاب بأحباط نهائيا لكنى اصاب بشلل فكرى يوضح لى الرؤيا لما حدث ....القصد المشكلة ان فى ناس بتتهم الشعب المصرى بالجهل والاكبر انها تدعى ان الشعب المصرى لا يستحق الا العبودية والقهر والظلم....خلاص عشان سمعت شتمتك بودنك من سنة ونص لحد دلوقتى فخلاص....الشعب يستاهل الحرق....طيب عملت ايه حضرتك للشعب عشان يتخلص من جهله ومن عبوديته فضلت تدخل على الفيس بوك وتشير وتكتب وبس ....على فكرة ابسط مواطن عنده فيس بوك الدياسطى سمير فى كفر ابو عجوة وبيكلم جو....هل نزلت الى الشارع والشعب وعلمت مدى معاناته ليتخلص من الظلم ويكون احيانا بمثابة انقلاب السحر على الساحر....هل كونت الة اكثر قوة من الالة الاعلامية التى تتحدث عن المؤمرات والبلطجة والفساد...هل كنت اكثر وصولا الى عقول البسطاء من توفيق عكاشة وحياة انثى العكش الدرديرى ....ولا مع اول قلم تستسلم...ولا سبب ما انت فيه يا من تقول ان الشعب يستاهل الحرق والاستعباد والقهر ان افكارك المبهرة دائما يشوبها الفشل ....برغم من جديتها...على فكرة اللى مات قبل 25 يناير بسبب الظلم والقهر واللى مات يوم 25 يناير فى الثورة واللى مات يوم موقعة الجمل واللى استشهد بعد يوم 11 فبراير لحد دلوقتى هو وابوه وامه واخته من الشعب اللى يستاهل الحرق والاستعباد ....لا تعلق فشل محاولتك لانجاح فكرة الثورة على شماعة الشعب لكن يجب ان تعلقها على ارادة غير موجودة عندك وناس ولاد كلب معنيين بأدارة شؤن البلاد سواء كان المجلس العسكرى او الجن الازرق...هل تذكر يا صديقى رسولنا الكريم صلى الله وعليه وسلم ماذا فعل به أهل الطائف وماذا عرض عليه ربه الكريم بملك الجبال وأن يطبق الاخشبين ...فرفض الرسول الكريم لعل يخرج منهم من يؤمن بالرسالة......وانت فى الاخر تقول شعب يستاهل الحرق كان قالها عاطف الجوهرى ولا علاء عبدالهادى ولا عماد عفت ولا ولا ولا ولا اقولك يجعله عامر ويارب الحدق يفهم
ليست هناك تعليقات:
إرسال تعليق