فى يوم فى شهر فى سنة نزلت من بيتنا فى الطريق لاستكمال نشاطى "بما انى ناشط سياسى " ومن فضلكم بلاش احراج و محدش يسألنى يعنى اول ما اصحى من النوم بعمل ايه بما انى ناشط سياسى ....القصد شوفت غراب واقف على باب البيت ...مع انى اكره نظرية انا تطيرنا بكم انما شكل الغراب فى هذا الوقت مريحنيش بالمرة ....استكملت الطريق....وطـــــــــــويلا جدا مشوارى...لقيت الناس فى حالة بهجة وسرور من غير فتحى طبعا...فى ايه يا اخونا ..بيقولك شمعوا المنظمات الامريكية بتاعة حقوق الانسان اللى فى مصر بالشمع الاحمر وعرفوا مين الخونة اللى بيخدوا فلوس عشان اسقاط البلاد وتعرف كمان يا بيه مرسى ابن المعلم وزير النقل الامريكى اتمسك يا مينز...جريت على الجرايد المصرية الغراء والمغرية وابتديت ادور ادور على نفسى....قصدى على خبر لتاكيد ما اسمع وتصحيح كمية المعلومات اللى رشقت فى وشى على الصبح من محمد القهوجى ...وعلى غير العادة لقيت الخبر مش فى الجرايد ...الا فى الجورنال اللى ملفوف بيه ساندويتش الفول بتاعى....ذهبت الى عم مصطفى بتاع الفول غاضبا وصرخت فى وجهه وقلت له يا راجل حرام عليك بقى خبر زى ده تلفوا فى سندويتش ....قال هأأأأأأأأأأأأأو سلامة الشوف يا استاذ دا مسلسل عن الجاسوسية هتعرض فى رمضان اللى جاى وعليك خير ...منظمات حقوق انسان مين اللى فى البلد اصلا مش اما يبقى فى انسان يبقى فى حقوق له ...اندهشت واستغربت وقلت لا عم مصطفى غلطان ...اكيد غلطان رجعت الى البيت " ولا يزال الغراب واقف " على باب البيت " فتحت التليفاز فوجدت اعلام ودنك منين يا جحا يهلل وينشد ويبجل فى المجهود الفولاذى لكشف المؤامرة البشعة والمخطط لتقسيم مصر ل 100 حتة على كل لون يا بتسطا ...القصد ....بدأت كل انواع القوارض تلعب فى عبى ان الموضوع فشنك وفاكيس اخر حاجة ولكن حفظا لماء الوجه وبالصدفة بنت اختى المصرية الاصل والامريكية الجنسية فى زيارة لمصر فى هذا الوقت ...فدخلت عليها مبتهجا وقلت لها بح لا ينفع معانا فيل ولا حمار ..مش الحمار بتاع زياد العليمى طبعا...الامريكان فى القفص والبسبور والسفارة بلوه واشربوه بالامريكان كافيه...الا انها ملكت القناعة فعلا ان هذا لم ولن يحدث وانا قبلها لكن فقط اردت انتصارا وحيدا لمبدا الكرامة التى نادت به الثورة ...وعم رئيس الاركان الامريكى رايح جاى والوفد العسكرى يرجع بسرعة والست هيلارى كلينتون بالنيو لوك تقولك مفيش قمح وخليكوا مع القمح الروسى الفاسد بتاع البهايم......ومادام لا يفل الحديد الا الحديد رددت عليها السيدة المخضرمة فايزة ابوالنجا وقالت لها قمح مين يا امو قمح مصر لن تركع ...والناس ماشية تغنى بالاحضان يا بلدنا يا حرة بالاحضان ترا ترا ترا ...يهديكم ربنا الموضوع فيه ان وبكرة الميا تكدب العويم والغطاس...وبكرة جه نزلت والغراب لا يزال فى بيتى وسمعت اغنية عبدالحليم حافظ " عدى النهار والمغربية جاي......فى ايه يا عم مصطفى ...قالى هأأأأأأأأأأأأأأأو الامريكانى خدوا الغراب وطار!!!!!!!الغراب اللى على بيتنا خد الامريكان بتاع قضية التمويل والحمار المخطط....قصدى المخطط بغض النظر عن الكــــــــلام الحلمنتيشى السابق ذكره عندى 3 اسئلة هامة
* المجلس العسكرى ايه اللى بيحصل ده ولما الصمت الرهيب لما حدث ؟؟؟؟ اولا المجلس العسكرى عاوز يسمع اغنية يا واد يا تقيل لسعاد حسنى ....بس انا بالفقاقة عرفت ايه المقابل اما عرفت من الست فايزة ربنا يسترها زى ماهى فضحانا قالت الحقوا النبك الدولى وافق على القرض دا غير المستثمرين الاجانب جاين فى وبور الساعة 6 والحياة بعد 6 شهور لونها هتكون وردى وبمبى بمبى
* الاخوان : الخال جون ماكين طلع وحلف طلاق تلاتة ليشكركم على مجهوداتكم فى الافراج عن الامريكان اللى فى التمثلية ...وابوس ايدكم ودقنكم وحياة عمنا المرشد ما تقولوا دى فتنة الناس دى معندهاش توفيق عكاشة ومبتعرفش تكدب!!!!! خت منهم ايه مقابل كده ودورك كان ايه فى المسلسل اكيد يشبه لدور غادة عبد الرازق " الاخوانية " فى مسلسل سمارة صح؟؟؟
* القضاء: كنت الامل الاخير لنا كغلابة وانتم عارفين المواطن المصرى اللى فى ايده ورق اليومين دول اما للعلاج او يروح يشتكى فى المحكمة عشان العلاج برده ...ايه اللى حصل يا ميدان العدالة فى مصر من اغمى اعينكم عنا كنتم الفرصة الاخيرة....والشيطان بيقولى ان منكم 75 % منتمين لجماعة الاخوان المسلمين ....ام ان الضغط الجوى القادم من بلاد سام ....وليكن فقد خذلتم مصر يا سادة
نهايته معندناش اقتصاد وقلنا ماشى حال البلد والبورصة وعجلة الانتاج....معندناش سياسة وقلنا كلها 6 شهور " وابقى قابلنى فى الميدان" انما بنت اختى تدخل عليا وتضرب كف على كف وتقولى يا خالوا حتى لو الحكاية كلها فشنك للامريكانى بلدا تحميه ويجعله عامر ويارب الحدق يفهم
ليست هناك تعليقات:
إرسال تعليق