بيقولك التغيير على وساخة بيجيب تسلخات ودى نصيحة عشان الصيف وبلاويه واللى بيجرا فيه ....القصد فى موضوع قديم وفات عليه كتير لكن والحمدلله على كل شئ نتيجته السودا لسه بتكرف علينا وعلى حال البلد ...يوم 19 مارس 2011 المجلس العسكرى ...الله.......يكرمه قال فى استفتاء على اعلان دستورى مؤقت لحين الاتنخابات وقلى البتنجان ...والمرحلة المنيلة بستين نيلة ...مش عارف ليه تواجد نصلحة الراجل ابودقن وقتها سواء السلفى او الاخوانى او حتى الكنائسى ان يتدخل فى مستقبل مرحلة من اشد واخطر المراحل لمصلحته وياريت بأسم الدين لا ده بأسم الجنة والنار ورضاء الرب ....واما الاعلام من سحرة الفرعون قبل ايمانهم لم يوضح انذاك فى حالة نعم هيحصل ايه وفى حالة لا هيحصل ايه ...حتى الشباب الفاهمة والواعية بتاعة الثورة جريت على اللاب توب والبلاك بيرى وتوتير وفيس بوك وسابوا الفكهانى وبتاع الخضار والقهوجى لسيطرة نغمة الاستقرار والاستمرار وعشان كيس الرز والمكرونة والزيت والسلع الرخيصة....كل ده مش مهم رغم انه كخ وعيب وحرام بس ينفع تقول لواحد مربى ذقنه حرام...القصد جه يوم الاستفتاء وخرجت من البيت والانس على وشها الفرحة يوم عيد او استفتاء مش هيحصل فيه تزوير " على الورق" وعقبال تزوير الارادة " ....والمدارس عليها طابوووووووووووور طويل ومناقشات بأدب واخلاق ومفيش حد بينظمنا ...كان لسه حماسة وروح الثورة جوانا بجد...ايام بقى ....القصد وقفت فى الطابوووور العريض ...وخير اللهم اجعله خير طلع راجل واقف ورايا " واشمعنى عمر سليمان يعنى " بس كان مربى دقنه وقال بعلو الصوت .....قلوا نعم عشان خاطر المادة التانية ...واللى هيقول لا ربنا يحسبه....التفت اليه بكل هدوء وقلت يا عم الشيخ اولا سواء نعم او لا ملهاش علاقة بالمادة التانية خالص وحتى لا برضوا ...بص يا عم الحاج وللاسف عم الشيخ مش عاوز يفهم مع انه مقتنع بما قلته على لا ونعم والاعلان الدستورى راح قالى بعلو صوته .....انت كافر يا ابنى....وعلت همسات الاخرين " لااله الا الله " وواحد يرد يقولوا حرام عليك يا عم الحاج اما تكفر حد ...فرد متهكما وهو مش حرام عليه اما عاوز يلغى المادة التانية بتاعة الشريعة الاسلامية " وده على اساس ان الشعب بيتفرج على افلام السبكى الخليعة وقاعد قدام حديث الروح والقنوات الدينية 24 ساعة .... القصد يا جدعان قلت له حقك عليا يا حاج وشكرا على اتهامك ليا بالكفر ....دخلت اللجنة وقلت لا ...وبعد كده انتظرت النتيجة اللى طلعت ان 77% عاوزين يدخلوا الجنة ويحافظوا على المادة التانية و22% كفرة وعاوزين يدخلوا النار ...ومشيت وصلت الى لجنة اخرى ...ولقيت نيافة الانبا فلان الفلانى بيقول لاخواتى الاقباط ان الرب هيحفظ مصر لو قلته لا.....ومرت الايام والشهور وعدت سنة وشوية ونفسى فى اللحظة دى اقابل الشيخ اللى كان واقف واريا فى طابور الاستفتاء وقله ها ...ايه رأيك فى الاستقرار والاستمرار والمادة التانية ....ايه رأيك فى اللى بيحصل من يومها لحد دلوقتى ....ونفسى اقابل نيافة الانبا فلان الفلانى اقولوا ليس ب لا يحفظ الرب مصر ....استكمال الثورة تحت الوضع الصحيح ...اما بالنسبة لى انا ...فعشان نعم.....انا كافر طيب وايه يعنى هو الكلام بفلوس طيب ما هو الجوع كافر ...وزى ما انت يا طالب مصلحتك تحت ايد الدين ومربى دقنك كارل ماركس كان مربى دقنه ويجعله عامر يارب الاقى الشيخ ده والحدق يفهم
ليست هناك تعليقات:
إرسال تعليق