ولما فتحت فؤادة الهويس وانتفض شعب الدهاشنة فرحا وعلم الاخ عتريس واعوانه....الخ (انظر الجزء الاول من التدوينة ) وهاج عتريس وماج فى القرية يحرق ارض ويموت الناس والدهاشنة فرحتم ياعينى ما كملت لحد ما قرر عتريس انه يقطع عرق ويسيح دم ....هيتجوز فؤادة عشان يحميها من نفسها ومن القرية ومن نفسه ....لكن جواز عتريس كان غصب عن فؤادة ومش برضاها وعتريس مكنش يعرف ....والساكت عن الحق شيطان اخرس....ابويا الشيخ ابراهيم مسكتش اما عرف ان جواز عتريس من فؤادة باطل فضل يعرف الناس والخلق من شعب الدهاشنة اللى كان محلك سر فى جوازة الباطل ....وفى ليلة بائسة جميلة سأل عتريس هى جوازتى منك باطلة يا فؤادة زى ما بيقول الشيخ ابراهيم فى البلد .....فؤادة ام عيون مليانة جنة ونار وعيند وشدة وهوادة قالت جوازك منى باطل يا عتريس ومش هتلمس شعريا منى ....كان الحل عشان فؤادة ترضخ لاغتصاب عتريس انه يأمر بقتل محمود ابن الشيخ ابراهيم فى ليلة فرحه (على فكرة انا مش بحكى قصة فيلم شئ من الخوف) لاء ده قصة الخوف عليكى يا مصر .....المهم راحوا الكلاب اعوان عتريس قتلوا محمود على اساس ان الشيخ ابراهيم هيسكت او فؤادة هتسلم ,,,, لا يا عتريس الدهاشنة فيهم الف محمود والدهاشنة عمرهم ما هيموتوا ....اتقتل محمود عشان ابوه قال كلمة حق اتقتل محمود فى ليلة فرحه عشان فؤادة تسلم ومسلمتش الجوازة باطلة ياعتريس,,,,الشيخ ابراهيم راح يكتب بالدموع على كل بيت فى الدهاشنة كلمة حق (جواز عتريس من فؤادة باطل ) وشعب الدهاشنة اللى معندوش حجة انه يفضل محلك سر ,,,,جواز عتريس من فؤادة باطل ,,,,,عتريس عاوز يقتل كل الدهاشنة لكن اعوانه الخونة خانوه وهربوا .....بس من مين ....اصل شعب الدهاشنة مستناش محاكمات وتأجيلات لا هجموا على رجالة عتريس .....وحتى على بيت عتريس ذات نفسه (بس عتريس مكنش فى شرم الشيخ وقتها ) بردوا مستنوش محاكمات من حد هما اقاموا القصاص على عتريس وحرقوه جوه بيتوا بينران الغضب والظلم والقهر والقصاص والضحك على الذقون .....ده كان الجزء التانى من قصة فتح الهويس ....واتمنى ان عتريس يفهم ان جوازه من مصر باطل وهنقتص منك وهنحرق فى نهاية المطاف ومش هنغنيلك ياعينى يا عينى عينى على والد لاء ............هنغنى لابد من يوم معلوم تترد فيه المظالم ابيض على كل مظلوم واسود على كل ظالم,,,,,ويجعله عامر وياريت كل ظالم يفهم
مرادفات الجزء التانى :
* فؤادة (شباب مصر الحر )
* الشيخ ابراهيم (اهل مصر من اهل الشهدا )
* محمود (شهداء الثورة )
*عتريس( النظام السابق - المجلس العسكرى - الاسلامين الاخوان منهم والسلفين - اصحاب المصالح والمتحولين - البلطجية وفلول النظام )
جواز عتريس من فؤادة باطل (مصر عمرها ما هاتكون الا للمصريين )
ليست هناك تعليقات:
إرسال تعليق