فى مطلع عام 2011 والدعوات تلاحق بعضها على الفضاء الالكترونى بالنزول للتظاهر اما ضد التعذيب والقهر او عيش حرية وعدالة اجتماعية والحيرة التى اطلعت على وجدانى ....هل يحدث ولما لا تظاهرة حاشدة قد يكون يعقبها تحذير وتغيير حقيقى ليس اكثر ولا اقل ...فلن نكون تونس !!!!! لكن خاب الظن واصبحت تونس مصر ومصر تونس 8 ايام من الثورة عشتها بين ميدان التحرير والاسكندرية وسأكون معكم فيها لعلهم لا يرجعون الى كتب التاريخ الصماء العاجزة ويدركوا من نحن من جيل 25 يناير 2011 أهدى هذه الذكريات الى صديقى وشريكى فيها وئام عبد العزيز
اليوم الاول : 14-1-2011 الساعة 7 مساءا-القاهرة
جالس مع مجموعة من الاصدقاء على قهوة سعد الدالى الساعة 7 بالليل وفجأة جه تليفون لصديقى محمد ارسطو " اسم الشهرة " التليفون من صديقنا وئام بيقول ...خبــــــر عاجل من الجزيرة هـــــــروب بن على على طائرته الخاصة لجهة غير معلومة ...فرحنا ولا أكن مصر جابت جون فى نهائى افريقيا ...وبصينا لبعض قلنا طيب ممكن ؟؟؟؟ هيحصل كده فى مصر؟؟؟؟
اليوم الثانى : 20 - 1-2011: الاسكندرية - بعد العشاء
انتشرت الدعوات على الفيس بوك بشكل غير مسبوق لاى ايفنت نهائيا المهم كنا انا وصديقى وئام قدقمنا فى وقت لاحق بعمل حركة شبابية للتوعية السياسية والمجتمعية واسمها حركة شباب من أجل مصر ...القصد كنت فى اسكندرية بناء على طبيعة عملى هناك فى ذلك الوقت وكان من المفروض انى اعمل على الحركة ايفنت ليوم 25 يناير 2011 وانا داخل السيبر لقيت عم جورج بيقول لى " معلش يا ابوحميد عاوزين بطاقتك " !!!!! قلت له اشمعنى يا عم جورج انت مش عرفنى ولا ايه ...ضحك وقال لى لا دى اوامر ودواعى امنية بصيت لقيت واحد شكله من مخبرين اليومين دول وبيراجع فى ورقة البيانات على ما اظن سيبت بطاقتى روحت فتحت الجهاز وفتحت الفيس بوك ولقيت صديق الكفاح وئام عبد العزيز بيكلمنى فحذرتوا مما حدث فقال لى نفس القصة او تقريبا بشكل مختلف مما تعرض اليه من اوامر امنية لدخول السيبر او النت كافيه " منهم لله بايعين اجهزة الكمبيوتر وشركات خطوط النت " ....القصد حذرنا بعضنا من نشر دعوات ليوم 25 يناير لكننا عملنا على الفيس بوك اتند او حضور للمشاركة فى يوم عيش حرية عدالة اجتماعية
اليوم الثالث : 24 -1-2011 : على القهوة فى الاسكندرية الساعة 10 مساءا :
كنت جالس مع مجموعة من اصدقائى الاسكندرنية الجدعان ومنهم صديقى المخلص بس مش اوى سامح حمزة...فقلت له ان القهوة مرشئة محبرين امن دولة تقدر تطلع 3 منهم ...ونجح لان كان شكلهم باين عليهم ...جاء صديقنا مايكل وقال ان الدنيا لجان شرطة وكماين ايه .... هما فاكرين ان فى حاجة هتحصل بجد ....رد عليه سامح قالوا ولا حاجة ...قلت لهم انا اجازة ان اشء الله ومسافر على القاهرة ومحتار اسافر الصبح قبل اى حاجة ولا براحتى ....رد سامح برده قالى يا عم برحتك ...قلت لسامح على فكرة بكرة يوم عالمى والجيش هينزل!!!!!!!!!
اليوم الرابع : 25-1-2011 : محطة رمسيس - القاهرة الساعة 1 ونص ظهرا :
نزلت من القطار وخرجت بره المحطة والشنطة على كتفى ....الجو هاااااادى هدوء غير عادى مفيش و مفيش ميكروباصات ولا بائعين ...مشيت من المحطة فى اتجاه عبدالمنعم رياض وانا ماشى لقيت كمية عربيات امن مركزى على الجانبين غير طبيعية فرحت وايقنت ان فى تحرك فى مكان ما سمعت اتنين بيقولوا فى 200 واحد عاملين مظاهرة عند نقابة المحامين !!!!!!!!!! يا ربى 200 واحد بس يا خسارة طيب اروح اتأكد بنفسى ...فجأة عسكرى بزى مدنى ماسك شومة موجهة لى " انت راكب المترو ورايح فين " ومن غير ولا كلمة لفيت ورجعت وركبت ميكروباص بيقول جيزة هرم جيزة هرم....الحمدلله رجعت الى شوق منزلى ...واجازة 4 ايام بحالهم منهم عيد الشرطة " سابقا" احلى أكل واجمد دش ونووووووووووووم ...صحيت على صوت امى بتقولى اصحى شوف اللى ....قلت لها ايه يعنى " قالت لى البوليس موت واحد فى السويس والدنيا مقلوبة !!!!!!!!!! السويس !!!!!!!!!! الدنيا مقلوبة ...وكانت القشة التى قسمت ظهر البعير ...الجزيرة باللون الاحمر على شكل عاجل مصادمات فى التحرير والسويس بعد سقوط ضحايا !!!!!! يا كل ده يحصل فى ساعتين نوم ...قلت يمكن الجزيرة بتهول ...حولت على التليفزيون المصرى ...القناة الاولى جايبا يوسف بك وهبى وهو بيقول ..الى احمد ابراهيم القاطن فى دير النحاس...طيب القناة التانية خيرى رمضان واسموا ايه ده تامر امين بيقول الاخوان المسلمين احدثوا فوضى ودنسوا عيد الشرطة المجيد !!!!!!
اليوم الخامس : 27 -1-2011 : الهرم الساعة 3 عصرا :
روحت مع صديقى محمد ارسطو المستشفى التخصصى فى الهرم عشان كان عامل عملية غضروف فى انفه فكان ميعاد فك الغرز وصلنا المستشفى ولقينا الناس بتتفرج عن ما يحدث فى السويس وكانت الدنيا بهدلة ...فقلت لمحمد يا ترى بكرة الجمعة وبيقولوا هتكون جمعة اسمها جمعة الغضب هيحصل فيها ايه ؟؟؟؟ رد بابتسامة قالى يا ابيض يا اسود ولكنها ستكون عظيمة " اصلوا غاوى لغة عربية " روحنا وبدأت اعمل ايفنت على الحركة عشان جمعة الغضب لقيت النت ضعيف جدا ....والاخبار بتتسرب ان النت متراقب وهيتقطع مع شبكات الموبايل !!!!!
اليوم السادس : 28-1-2011 : الحوامدية بعد صلاة الجمعة :
خلصت صلاة الجمعة فى مدينة الحوامدية الهادئة وانا صليت فى مسجد اسمه ابوالحسن ثم توجهت بدون ادنى سبب الى المسجد الرئيسى بمدينة الحوامدية " مسجد الشيخ محمد أحمد " لقيت الشباب مترقبين لشئ ما يحدث .....وفجأة الشعــــــــــب يريد اسقاط النظام !!!!! ايه ده فى الحوامدية وبدا الاف يجبون شوارع المدينة الصغيرة وكنت اهتف وبدون خوف الشعب يريد اسقاط النظام الى ان وصلت الى بيت اختى ....وعلمت ان زوجها عماد نزل صلى فى مسجد الفتح برمسيس " من غير ما يقولى الندل " كانت فى غاية القلق ..لا شبكة موبايل ولا غيروا اصريت انها تكون معنا فى البيت احسن بدل ما تكون لوحدها ....روحت البيت بتابع ومش مصدق اللى بيحصل القنوات الفضائية شغالة والتليفزيون المصرى كانت امه ماتت باين فشغلين اغانى وطنية بتاعة بطولة افؤيقيا ...القصد سامع صوت طلقات نارية فى الجو قلت لولدتى على فكرة فى ضرب نار ....قامت ولدتى واجرت اتصال على التليفون الارضى بصديقتها لحد ما عرفت ان قسم شرطة الحوامدية بيولع ومعاه المؤسسات الحكومية .....طلعت الدور الرابع فوق سطع البيت....كانت كمية الدخان تنم على ان هناك حرب وليس مجرد حريق...جريت ناحية قسم الشرطة ولكن الساحبة اوقفتنى عند المترو والهرج والمرج والفوضى عارمة وهناك قتلى وجرحى ....من حتة قسم ...يا لا تهويل الشعب المصرى !!!!! فى ساعات تم فتح السجون والرعب يزداد والشرطة فى خبر كان وكل الاخبار ...هوبا فكرة تكوين اللجان الشعبية ومسكت الشومة شوية ووقفت مع شباب الحتة الا ان حدث اتصال بينى وبين صديقى محمد ارسطو اللى كان فرحان بنزول الجيش " ويا فرحة ما تمت " قابلت محمد ارسطو ومعنا صديق لنا يمثل المواطن المصرى الاصيل فى الجدعنة والطيبة والذوق وهو محمد ماهر وخدنا جولة فى المدينة لنشاهد اروع وزارة داخلية وطنية جعلتنى اشعر بالامان وقتها .....
اليوم السابع : 31-1-2011 : ميدان التحرير : الساعة 2 ظهرا - كوبرى قصر النيل:
على احر من الجمر كنت بانتظار صديق الكفاح وئام عبد العزيز اللى راكب تاكسى من المهندسين وجاى بسرعة لكن المسيرات معطلة الدنيا ....والمسيرات بتمر قدامى على كوبرى قصر النيل والشعب يريد اسقاط الرئيس.....وارحل ...وانا كل شوية اتصل بوئام " يا عم انت فين انجز التحرير ينادينا والثورة مشتاقة .... القصد لقيت واحد بيوزع ورق ومنشورات مكتوب فيه يا شباب اللى بيحصل لمصر ده غلط والدنيا والدين والعيشة ...الا ان الشعب اللى كان بياخد الورقة دى يشتم فى اللى بيوزعها ...لحد ما جه راجل عجوز خطف الورق كله بالعافية اللى مع المندس ده ورماهم فى النيل ....والشعب يريد اسقاط المشير ....ومنظر الحزب المحترق على ضفاف النيل والطيارة الهليكوبتر بتلف وبتلف وانا مستنى وئام اللى أخير جه وخدنا بعض بالاحضان يا بلادى يا حرة بالاحضان...وجرينا على الميدان ....مش مصدق طوابير وزحام ولا نهائى كاس عالم لمنتخب مصر ونظام ولا نظام الناس فى اوروبا ...تفتيش على اعلى مستوى....بالحب والتراضى والابتسامة المصرية الجميلة عدينا الميدان ...مش مصدقين العدد والهتافات ...يا ممثلين على مغنيين على شباب زى الفل ....على مصريين بسطاء....مسلمين ومسيحين ....بس كلهم مصريين ...شاب بيحمى اخته البنت المصرية اللى ميعرفهاش مكنتش مصدق انا ووئام انها التوربيا المدينة الفاضلة التى رسمها افلاطون فى خياله ...بعد مرور ساعات من الدفء وسخونة الهتافات ويقين نجاح الثورة المصرية جوعنا انا وصديقى وئام....طيب فين كنتاكى اللى بيقولوا عليه ده ....فين الفلوس مفيش...مشينا اكتر من ربع ساعة لحد ما وجدنا كشرى التحرير فى باب اللوق وقف صديقى وئام فى طابور لمدة ساعة ونصف والظاهر ان كل اللى كانوا واقفين مش عرفين ان فى كنتاكى بتتوزع نجح وئام انه يخبلنا علبتين كشرى وصايا ...وبعد كده واحد شاى مع واحد ينسون وتوكلنا على الله للميدان مرة تانية والعدد بيزيد فقررنا المبيت وكلمان ارسطو يحصلنا الصبح عشان فيه لدعوة لتظاهرة مليونية فى التحرير....بعد الهتاف والاغانى الوطنية والمناقشة الفاعلة والهادئة بين ناس منعرفهمش ....حان الان موعد العشاء على حسب التوقيت المحلى لميدان التحرير. فى باب اللوق ... وبعد العشاء فى محل صغير للفطائرروحنا الى اقرب مقهى وشربنا ينسون دافى عشان الهتافات واتصل بنا صديقنا محمد ارسطو واكد انه سيكون موجود الصبح معنا فى اول مليونية ووئام وصاه بالفطار معاه...تعرفنا فى وقتها على رجل جميل فى عقده السادس كان مصمم انه يسمع لنا وبس وكل اما نقول حاجة يردد " ايوه الله ينور عليك " الله يفتح عليك " رجعنا الميدان الساعة 2 بالليل اشاعة ان فى ناس من انصار مبارك بيتحركوا من عند ماسبيؤوا ومعاهم سلاح وسنج....حالة من الهلع اصابت الميدان وقام الشباب بتأمين الميدان من ناحية المتحف المصرى وفجأة ظهرت عربة مطافى من الدفاع المدنى قادمة من جهة شارع شامبليون وفجأة قام الشباب بالوقوف امامها ورفضوا دخولها الميدان وجاء ظياط من الجيش وامروا السائق بأن يرحل ولا مجال لدخوله الميدان بحجة حرق فى المتحف المصرى...وفجأة بدأت مدرعات ودبابات الجيش فى التحرك فى تحركات مفاجئة وكبيرة وكثيفة لمداخل الميدان فدخل الميدان لواء جيش " حسن الروينى " قائلا يا جماعة والله بتتحل لصالحكوا واصبروا !!!!!!وكان فى الجهة المقابلة المستشار زكريا عبد العزيز بيتكلم مع الشباب ويشرح للشباب عن تسليم السلطة فى حال تنحى مبارك....وانا بدورى دخلت الى الميدان لاشرح للموجودين سبب الساتر والدرع البشرى واطلب من الشباب التطوع ...الموضوع فكس...الميدان هادئ ...الجو قارس البرودة حان وقت النوم ...فدخلنا انا ووئام الى الصينية وراتمينا على الارض...درجة الحرارة 9 والجو برد وانا ووئام نقاوم البرد من الجو ومن ارضية الجنينية الا انى غفلت لدقيقة فوجدت احد ما مصرى لا اعرفه بقوم بتغطيتى ببطانية ..وقال لى انا اسف لو كنت صحيتك...انا رديت عليه بكل دفئ وطمانينة لا بالعكس الف شكر ليك ربنا يكرمك....جالوا تليفون فقال يا محمد قول لخالد ابو النجا عاوزين بطاطين ....الله اكبر ...الله اكبر ...صلاة الفجر قمت وروحت اتوضيت من خرطوم ميه متلجة فى الصينية وصلينا الفجر فى مشهد مهيب ورجعت اغفل تانى ......
اليوم الثامن : 1-2-2011 : أول مليونية بعد جمعة الغضب :
يا مصر هانت وبانت كلها كام يوم نهارنا نادى ونهار الندل مش باين بهذا الكلمات ايقظنى تميم البرغوثى انا ووئام بعد بضع دقائق من النوم بعد صلاة الفجر فوجدنا البروجكتول شغال على تمسم فى اتصال على الجزيرة مباشر مصر ...يا صبح طلعت روحنا لجل تيجى يا خى رايحين نجبها اهو من كل حارة وحى ...وصلت لضرب الرصاص على الخلق فى الميادين ...من اول مرة حفظنا كلمات عظيمة ...ذهبنا انا ووئام فى شارع طلعت حرب على المقهى لنتناول الافطار المؤقت عقبال ما ارسطو يجى ...ثم رجعنا الميدان والصبح بدا يتنفس والنوم والارهاق يحتلان ملامحنا...وفجاة لقيت نفسى نايم على رصيف فى الميدان وسمعت وحدة بتوقل يا ولاد حطوا كارتونة تحت دماغه وهات البطانية يا محمد غطى اخوك...وكنت فاكر نفسى بحلم وبعدها مش عارف بكام ساعة لقيت واحد كبير فى السن بيصحينى وبيقولى يا ابنى قوم الساعة بقت 9 الصبح....فقلت له والله يا عمى مفيش الاساعتين دول اللى نمت فيهم...رد باتسامة مصرى حر ." هانت والله معلش يمشى وننام برحتنا " ...فين وئام مش عارف ....يا وئام انت فين يا عم ...قالى محمد ارسطو جاى من ناحية محمد نجيب ومعاه صديقنا محم حسن " اشتراكى سابق واخوانى حالى " ...محمد ارسطو دخل الميدان فى ذهول وحب حنين وكل حاجة وعمال يقول اللـــــــــــــــــــــــــــــــــــــه ..وبعد تناول السندويتشات مع الهتافات ...الميدان بدء فى التزاحم والساعة لسه مجتش 11 الصبح...تم تكوين اللجان الشعبية على مداخل اللجان من جميع المناطق واحنا داخلين من ناحية باب اللوق طلبوا مننا التطوع لان عدد المتظاهرين القادمين فى مسيرات كثيرة فدخل الجميع الميدان الا انا قمت بالتطوع مع اللجان الشعبية من ناحية باب اللوق وبصوت عالى فضلت اقول : من فضلكم البطاقة الشخصية ومن الضهر عشان سلامتك وسلامة ميدانك وثورتك وعشان نتاكد انك مش شغال امين شرطة او خلافه ...وبصراحة الكل كان متعاون وربنا كان هادى الشعب المصرى الا شيخ جاى يجرى وعاوز يدخل الميدان ويقول انتوا بتعطلونا ليه انتوا تبع مين مصر مصر الله اكبر ...الى ان تدخل الشباب وفهموه الوضع ....وانا فى مأزق الموبايب فصل شحن واصدقائى جوه فى الميدان وسط 2 مليون مصرى والحسابة بتحسب ....دخلت الميدان بعد ساعة ونصف من انتهاء مهمتى والحل ...حتى حاولت الاتصال بهم من موبايب اخ مصرى معرقوش منفعش الشبكة داخل الميدان زفت؟؟؟فضلت اهتف واهتف واتكلم واتناقش والشعب يريد اسقاط النظام حتى خرجت الساعة 4 عصرا لاريح قدمى وذهنى وصوتى لان حنجرتى اوشكت على الانشقاق عنى...وانا فى اتجاهى الى باب اللوق وجدت الصحبة الحلوة قاعدة فى انتظارى وبعد عتاب لدقائق ذهب ارسطو ومحمد حسن للبحث عن اشهى طعام لان مكنش فى مجلات فاتحة نهائيا اليوم ده لا فى طلعت حرب ولا باب اللوق وفين وفين مطعم فول وطعمية بجوار مسجد الاوقاف اللى فى جواد حسنى وبعد نصف ساعة اتصل ارسطو بينا وذهبنا اليه انا ووئام ونحن منهكين مرهقين وانا اشعث اخبر وعثاء اليوم !!!!! فول طعمية على الفطار والغدا نعمة والحمدلله احسن من مفيش...اذان المغرب وهنصلى فى مسجد الاوقاف ...بس وئام قال يا جماعة انا سلمت نمر هروح اريح على ان ارجع ىالغد بس انا منمتش من امبارح الا ساعتين واسألوا احمد....غادر وئام ودخلنا المسجد وخلعت نعلى بعد 14 ساعة ارتديه واغتسلت بعد طابور طويل عريض ...واللهم قوى ايمان الجميع ....الامام فى الصلاة يدعوا على الفرعون وفين فى مصر وفين فى مسجد الاوقااااااااااااف ...الله يا حرية والله يا ثورة...خرجنا ورجعنا الى الميدان وثرنا مرة أخرى حتى قرر ارسطو المبيت الا ان صديقنا العزيز محمد حسن لم يرجح المبيت فى الميدان وقلت لارسطو انا مرهق ومحتاج انام عشان عاوز اكمل وانا على اكمل وعى وقررنا الذهاب لبيوتنا وبعد ما دخلت البين لقيت خبر عاجل خطاب للمخلوع وبدأ فى البكاء فيه فخبطت على دماغى وقلت اخ ابن ال.......الشعب كله هيصدقوا!!!!!!! الا ان حدثت موقعة الجمل اليوم التانى والحمدلله لتكشف عن نيتهم القذرة فى قتل الشعب
اليوم التاسع : جمعة الرحيل : 4-2-2011 : صلاة الجمعة فى الميدان :
بعد طول غياب عن ارض الوطن ظهر الشيخ يوسف القرضاوى فى ميدان التحرير يخطب لنا فى صلاة الجمعة والتجمع مهيب وصلى بنا الشيخ محمد جبريل وكان يوم اخر نتمنى فيه الرحيل الا ان هذا ابيو ملم يكن فيه الكثير الا انه كان يوم اهتزت فيه اروقة القصر مرة اخرى من التصميم والارادة والثورة و8 مليون على مستوى مصر
اليوم العاشر : يوم التنحى : 11-2-2011 : الاسكندرية :
رجعت الاسكندرية عشان الشعل وفى يوم الخميس كنت مروح مع صديقى السكندرى سامح حمزة ووقفنا عند فكهانى يسمع اخر خطاب المسموع وهو يقول وسوف وسأظل ...راح الفكهانى قلع اللى فى رجله وضرب التليفزيوم اللى اتكسر وقال ان لسه ستظل يا ابن.................وشتيمة من اللى فلبك يحبها......تانى يوم قمت صليت الجمعة ولقيت مظاهرة حاشدة تتحرك من ميدان الساعة متجهة الى باكوس حبث مقر الاذاعة السكندرية والقناة الخامسة وسمعنا ان فيه تعداد اكثر فى طريقهم الى قصر التين لمحاصرته ,,,,, وبعد انضمام الكثيرين الينا ووصولنا الى مقر الاذاعة صلينا العصر واعتصامنا هناك وتكلمنا مع المقدم المسؤل عن تامين الاذاعة من قوات الجيش ..وكانت الاغاتى الوطنية والجو هناك والاخبار التى تاتى من القاهرة تزبدنا تفاؤل فقمت بالاتصال بوئام ومحمد ارسطو وشرحت لهم الوضع وانا وسط 500 شخص مصرى.....على صلاة المغرب افتكرت انى مكلتش حاجة من الصبح فرجعت الى سان ستيفانو ولقيت مطعم وكافيه ريو واول مدخلت سمعت : قرر الرئيس محمد حسنى مبارك تخليه عن منصب رئيس الجمهورية وكلف المجلس............ وسمعت زغروطة اسكندرانى مش هاسمع زيها تانى فى حياتى ومعرفش انا حضنت مين وكلمت مين فى الموبايل ولا حتى روحت على الكورنيش ازاى ورقصت مع ناس معرفهاش لحد الصبح......وعدت سنة عليكى يا ثورة اتسرقت واتنهبت وبيحاولوا يموتوكى.....عشان كده انا نازل اكمل العشر ايام دول يوم 25 يناير 2012 ويسقط حكم العسكر
ليست هناك تعليقات:
إرسال تعليق