ريما.....!!!!!

وكأنك يا ابوزيد ما غزيت .....كنت دايما اسمع الكلمة ومعرفش ده مثل شعبى ولا حكمة ولا موقف اتبنت عليها الجملة دى .....اما رجعت ريما لعادتها القديمة بصمت بالعشرة ان اللى قال المقولة دى بيفهم وعلى رأى سعيد صالح فى مدرسة المشاغبين (الراجل ده بيتكلم صح مادام قال دراع مرسى يبقى بيتكلم صح ) القصد سبب انى مقتنع بالمقولة دى ان وبعد احداث الدولة العباسية فى ذكرى ثورة يوليو وحدث ما حدث (ولنا فيها مأرب اخرى ) وقبلها من يوم جمعة الثورة اولا وصحيت لقيت التليفزيون المصرى قبل ايام التنحى .....بتوع التحرير دول عاوزين ايه .....اصحاب المصالح واللعب بالثورة .....وناس تتصل تقول سوفاج حرام عليهم عاوزين يخربوا البلد ....والمذيع يقول الصور توضح التظاهرة بالمئات ويتخللها عناصر بلطجية مع ان فى الوقت ده كان موفد قطاع الاخبار والتليفزيون المصرى مضروبيين وممنوعين من دخول الميدان....جريت على النتيجة عشان اشوف النهاردة كام فى الشهر وهو المخلوع تنحى ولا كان ده حلم وانا لسه صاحى منه التليفزيون المصرى بيقول قلة وبلطجية وبيجيب ناس بيقولوا عليهم انهم محللين سياسيين وهما باين عليهم مخللين خيار ...ده غير التليفونات اللى فكرتنى بتامر بتاع غمرة بس المرة دى هبة بتاعة روكسى......اتصل بالقناة الاولى تحديدا صوت رقيق جدا يشرح القلب : مساء الخير لو سمحت انا كنت عاوزة اتكلم ومن فضلكم سيبونى اتكلم ومحدش يقطع كلمتى احنا فى زمن الحرية
المذيع الهمام : اتفضلى
هبة من روكسى : انا بكلم حضرتك وانا على فكرة من المشاركين فى الثورة ...بس اللى بيحصل دلوقتى اوفر ....اوفر جدا الناس بتوع التحرير فاكرين نفسهم هما اللى هيغيروا الكون والتحرير مش كل حاجة ومش مصر كلها فى ميدان التحرير وبعدين حد فيهم يقدر يقولى هما بيشربوا وياكلو منين ....انا شوفت ناس على فكرة بتشرب كنز بيبسى ....وبعدين عيب عليهم يقولوا حاجة على المجلس العسكرى والجيش اللى حما الثورة هما بينكروا الجميل ولا عاوزنا نكون اليمن واسمها ايه دى ...ليبيا ,,,,,,,,,كل ده والمذيع مبتهج وفرحان وسعيد وابتسامة عريضة على وشه ولا بتوع اعلانات معجون الاسنان ....وبعد ما هبة اتكلمت وكملت كلمها خرج المذيع فاصل بأغنية : مشربتش من نيلها....وبعد ما الجيش ارتكب افظع حماقاته التاريخية على مر الزمان بتخوينه حركة شباب ६ ابريل(اول اجتماع مع الشباب من المجلس العسكرى بعد التنحى وقبل ائتلاف الثورة كان مع ६ ابريل اما اشاد الجميع اللى فى المجلس بدور الحركة الوطنى والفعال والبادنجان ) وجاب التليفزيون صورة احد الاعضاء البارزين للحركة وهو ماسك سلاح كلاشينكوف وبتقول ان ده تدريب للحركة الشبابية على قلب نظام الحكم مع ان الفيديو كان لاحدهم وهو فى زيارة لقطاع غزة اللى كان المخلوع محاصرها وكانت المؤسسة العسكرية فى ظل نظامه بتقبل المعونات العسكرية الامريكية لتسكت عما يحدث ده غير المئات من القادة العسكريين اللى بيدرسوا ويدربوا فى قاعدة فرجينيا الامريكية....القصد لقيت صورة على جنب الشاشة عليها رمز الجيش والشعب ايد واحدة ....فاكرين حافظوا على مصر,,,,,مش ممكن هو ده تليفزيون الثورة ....فين المسلمانى وحافظ المرازى وحمدى قندبل ودرية شرف الدين .....راحو فى خبر كان .....طيب ولا لسه عبداللطيف المناوى وانس الفقى موجودين لالالالالالالا.....اكيد ان ريما رجعت لعادتها القديمة ......الى كل المصابين بالشلل النصفى عافكم الله وشفاكم لا تشاهدوا التليفزيون المصرى فانكم مصابون بشلل كلى ليس له علاج علميا او نفسيا......... ويجعله عامر ويارب ريما تفهم!!!!!!