حصريا

حبيت اكبر دماغى اليومين دول من القيل والقال وام احمد قالت لام محمد ومن الاخر حبيت اصفى ذهنى بعيدا عن برامج التوك توك او التوك شو (الا ما رحم ربى ) وحتى تخلصت من ادمانى لقناة الجزيرة او الجزيرة مباشر مصر.....نفسى انام من غير كوابيس وازعاج فقررت ان اشوف ايه استعداد القنوات الاخرى للشهر الكريم والمبارك رمضان وكل عام وانتم بخير,,,,,كانت فرحتى العارمة ان السنة عشان الثورة وعجلة الانتاج المفسية دى مفيش حاجات كتييييير مفيش اسفاف كتيييييييييييير....ولا ضحك على الدقون .....وبما ان مفيش فلوس وتأثر شركات الانتاج التلفزيونى هذا العام ....فأن السفاقة هتقل ....ويا فرحة ما تمت كل اما اجيب القناة الفلانية (عشان الدعاية بس ) حصريا فى رمضان ,,,,, اجيب قناة غيرها ( هذا المسلسل لن تروه الا على هذه القناة فى رمضان ) مع انه هو هو اللى القناة الاولنية قالت عليه حصريا فى رمضان.....طيب والقناة اسمها ايه بتاعة الناس الطيبين (هذه القناة تعرض مسلسل رمضان الحصرى للممثل الحصرى فى الوقت الحصرى ) وهو هو المسلسل بتاع حصريا فى رمضان ولن تروه الا على هذه القناة .....والعجيب والغريب فى الامر انه مش مسلسل واحد لاء القنوات الحصرية هتذيع 100 مسلسل حصرى فى رمضان الحصرى للممثلة اللى فطرت الناس رمضان اللى فات وكل رمضان والممثل اللى حلف طلاق تلاتة انه ميكملش المسلسل عشان حقه الحصرى ... اصله خد فى المسلسل السنة دى 10 مليون بس...وتذكروا كل ده ومفيش فلوس بسبب احداث الثورة وخوف المنتجيين الحصريين ......طيب لو كان فى فلوس كانوا بقوا كام مسلسل حصرى فى قنوات حصرية (الله يرحمك يا جدتى كانت دايما تقولى رزق الهبل على المجانين ) جريت وانا حزين على التليفزيون والفضائيات ..... لا ده الردح اللى على التوك شو احسن اهو على عينك يا تاجر مش حصريا .....نزلت الشارع احس او اشم نسمة الهوا الرمضانية بين الناس وهى بتشترى الفانوس والزحمة والماكولات الرمضانية .....وكان ما كان ....حتى عم فضل البقال بتاع البضاعة المنتهية الصلاحية عامل عرض للسمن والزيت بمناسبة رمضان الكريم ,,,العرض ده حصريا عند فضل البقال .....او سوبر ماركت الريس فعامل عرض لن تروه عند اخرين حصريا ياميش رمضان هذا العام من الهند !!!!!!!!!! يا رب انا فى حلم ولا علم قلت لالالالا انا لازم اشوف حل فى حصريا دى .... رحت على قهوة عم سعد الدالى (رحمة الله عليه) لقيت القائمين على القهوة بيقولوا يا ياعم احمد بنفكر نعمل خيمة فى رمضان حصريا على مستوى المحافظة وهنقول ما ستجده عندنا لن تحده عند الاخرين ....حلفت ما انا مكمل وكان الحل الوحيد للخروج من كابوس حصريا ده انى ارجع طفل واروح اشترى فانوس بيغنى اغنية عم عبد المطلب ...بكام ده يا ريس لو سمحت (انا ),,,,, ببلاش عشان خطرك يا بيه (بائع الفانوس ) على فكرة يا برنس الفانوس ده مصرى اصلى وحصرى عند العبد لله ومش هتلاقيه فى اى حتة تانى ............وماذا تفعل لو كنت مكانى ؟؟؟؟؟؟ سؤال فى انتظار اجابته وحصريا ....,الموضوع بسيط بس انا اللى كنت مجعلصها شوية عرفت وفهمت (ويارتنى ما فهمت ) ان الاسفاف التليفزيونى فى رمضان وان اجر الممثل فى الكام مشهد دول يتجاوز 15 مليون جنيه ....وان اعلان عم فضل البقال عن السعر والعروض للسمن والزيت استعدادا لرمضان ....دا غير ياميش رمضان وعروضه فى مصر وتهافت الناس عليه ...وخيمة رمضان فى الكافيهات والسهرات وحتى الفانوس .......كل ده فقط تجدونه فى شهر رمضان وفى مصر فقط و.............................. حصريا
ويجعله عامر ورمضان كريم