اصحى يا نايم

اصحى يا نايم ....وحد الدايم
يا مصرى يا قايم
فجر البلاد دى لساه صايم
سبنا الميدان بدرى
ورحنا على بعض نتعازم
نتقسم ونقسم الغنايم
اصحى يا مصرى ...اصحى يا نايم
روحت ازور العريس
فى الاربعين بالسويس
قالوا لى قتله الخسيس
بدمعة حزينة سألت
يا خلق للدرجة دمه رخيص
ركبت وابور الصعيد الجوانى
رحت بيه على جرجا طوالى
لا لقيت هناك لا عركة ولا فتنة
دا ليلة الواد عربى على البت فاطتنة
ادلج الشربات على التوب
وقالوا السبب عم حنا
يبقى فين الدم وفين الفتنة؟؟!!
اصحى يا مصرى ...اصحى يا نايم
اصحى فى اسكندرية
من ابو قير للمنشية
هتلاقى هناك الحكمدارية
لساها بتلعب مع الخلق
عسكر وحرامية
يا نخل العريش
حقك وحقى باعوه للقرد بقشيش
ما هو الغراب حط ايده فى ايد الخفافيش
اصحى يا مصرى ...اصحى يا نايم
العسكر احتلونا
دول عسكر ولا بهايم
فى الاولة :تحية واعتزاز للشهيد
والثانية : رفع لنا صباعه البعيد
مش مقامك تركب دبابة
انت اخرك تغنى على ربابة
مش عارف الفرق بين البيادة
ودور العبادة
انا مواطن بسيط
لا ماسك سنجة ولا طبنجة
ليه تدوق على راسى الف دقة
يا ما دقت على الراس طبول
اتعظ كان فيه قبلك غول
عمل مهما عمل بالجمل والخيول
طلع نهار الحق وهو كما لو
كلب فى القفص مغلول
اصحى يا نايم وحد الدايم
اصحى يا مصرى يا قايم
فجر الثورة فى مصر لساه صايم