وزارة كرة القدم

من أجل منتخب افضل ومن أجل كاس عالم ومن اجل دورى عام يضاهى الدورى الانجليزى والاسبانى والالمانى ومن أجل مشاركات كروية على المستوى الافريقى....هناك اقتراح مقدم من العبد لله شخصيا وهو انشاء وزارة اسمها وزارة كرة القدم وعلى شرط تكون وزارة مستقلة ملهاش علاقة بالرياضة ( ومن امتى كرة القدم عندنا فى مصر لها علاقة بالرياضة ) وعشان نفسنا نشوف لاعيبة عندنا زى ميسى وايتو او حتى دروجبا ,,,,ونبطل فكرة الدورى العام دى نهائيا ونلغى الاهلى والزمالك والاسماعيلى لان حتى بعد الثورة ما قامت الاهلى هو برضه شكله كده اللى هياخد الدورى (انا اهلاوى ) المهم ان الوزارة دى يمسكها واحد بيفهم فى حاجة ومابيفهمش حاجتين ...اما الحاجة اللى بيهم فيها هى انه ينزل ميدان التحرير كل شوية واللى مايفهمش فيهم اولا الكورة وثانيا اللعب تحت الطرابيذة وما ادراك اللعب تحت الطرابيذة وكان من اهم اسباب اننا بنروحش كاس العالم انه ليس ذات قيمة على حسب تصريحات المدير الفلولى السابق انه تكلفة العلم المصرى للتشجيع اكثر بكثير من كأس العالم ده نحاس صينى متغطى بقشرة الدهب طيب اسألوا كده اباطرة اتحاد الكشافة الملقب بالاتحاد المصرى لكرة القدم الامريكية ...اظن لانهم مالهموش علاقة باللعبة نهائيا ,,,,اما الاقتراح التانى ان يكون بديل بطولة الدورى الممتاز... هو دورى الحوارى والنجوع والقسم الثانى دورى العشوائيات والفقراء واتفرج على الترس دورى العشوائيات بقى ياعم .....سنج ومطاوى وهيصة ,,,,,, واكيد من الحارة او الشارع او العشوائيات او الفقراء المساكين هنطلع لاعيبة هايلة وعلى ان يشرف على لجنة التحكيم داخل وزارة كرة القدم اقدم عسكرى مرور فى مصر ...كده هنضرب عصفورين بطوبة ان الصفافير متوفرة وانهم فاهمين قوانين اللعبة ومش عارفين فى اغلب الاحيان شمالهم من يمنهم .......تمام زى حكام اليومين دول وهنعمل داخل الوزارة نقابات مستقلة لللاعيبة الاساسيين ولحراس المرمى والغلابة الللاعيبة الاحتياطى ......طيب محدش سألنى انا ليه بقترح الحل ده بالذات لانقاذ كرة القدم المصرية والاسباب كالتالى :
* اولا عشان نخلص من اللعب تحت الطرابيذة وجبلاية القرود الخضرا والصفرا
* عشان حرام انى كشاب اطلع معرفش الا رئيس واحد ( لحد قبل الثورة ) وكمان اخر كأس عالم ليا كان سنة تسعين ( هدف تاريخى للتاريخى )
* لو بتوع العشوائيات والنجوع والحوارى والفقراء حسوا ان لهم كرامة هيطلع واحد احسن من ميسى اللى كان بيلعب فى الخرابة ولا كرستاينو رونالدو اللى كان بيمشى كيلومترات عشان يروح المدرسة لان ابوه معهوش فلوس مواصلات ولا للساحر رونالدينهو اللى اتفصل من المدرسة عشان ماكنش عنده الا جزمة واحدة بس ومتقطعة .....بس كان عندهم حاجة مهمة جدا ....ارادة نبعة من انه مواطن محسوب على الحكومة داخل بلده.... ويجعله عامر يا مصر ويارب الحدق يفهم