بالدليل القاطع : ميسى من ثوار يناير

اللى ما بيفهموش فى الكورة عارفين ميسى او على الاقل بيسمعوا عنه اما الفهيمة الكبار عارفين ان ميسى هو اللى مدوخ مدافعين تسبانيا والعالم فى اوروبا وعلى المقيمين خارجها مراعاة فروق التوقيت فى المباراة اللى ميسى هيلعب فيها ضدهم ,,,,المهم الاكتر تفصيلا عن حياة ميسى الخاصة انه كان على اد حاله هو واهله اخر حاجة وكان بيلعب فى الخرابة اللى ورا بيتهم فى الارجنتين (بعد البوسطة ) وبالصدفة شافوا مدرب مغمور لفريق مغمور وكانت المشكلة عند ميسى انه كان شبر واقطع لدرجة انهم فاكرين انه قزم ( انا اطول منه شوية) بس اللى انا بتوقعه ان عم ميسى لاف وداخ السبع دوخات عشان يعالج نفسه وما ادراك اهمال المسؤلين والمستشفيات فى الارجنتين والروتين عشان يطلع قرار علاج على نفقة الدولة الا ان وزير الصحة الارجنتينى رفض لعدم كفاية الادلة على قصر قامة ميسى وعلى رأى المثل الارجنتينى (اللى ما يشوفش من الغربال يبقى اعمى ) ..... المهم انه ميسى قرر التحدى الكبير الراجل لعب واحترف واشتغل وكسب واشتهر وتقريبا مخاوى جن ....لحد ما قامت ثورة يناير العظيمة وقرر انه يسرد على اسقاط النظام الارجنتينى بمبدأ العولمة انه يتظاهر معانا فى ميدان التحرير وقرر فعلا الا ان مباراته امام ريال مدريد فى الكاس وبطولة اوربا عطلته شوية .....اكيد كلكم عاملين تتهمونى انى ابو لمعة او ابو العربى من الفشر اللى انا بتكلم فيه ده ,,,,,وانا بقولكم بالدليل القاطع ان ميسى كان من ثوار يناير اللى فات ....اولا وقف مع فريقه دقيقة حداد على ارواح الشهداء امام احدى الفرق الاوربية ....بلاش دى يا عم الحاج وخليك ورا الكداب (انا ) لحد باب الدار ....حتى لو دار العمدة ,,,,,طيب الدليل القوى هو اعلان ميسى الجديد بتاع كنتاكى ,,,,, وحركات الكورة اللى كانت فى الاعلان دى توجيه سرى للمتظاهرين فى الميدان وكمان اخر كلمة فى الاعلان بالعربى مش بالاسبانى ولا الارجنتينى بيقولك ( دجاج كنتاكى سره لذيذ ) فعلا ولو ماكنش الشباب بتوع الميدان الماسونيين اكلوا من كنتاكى كان هيبقى سره لذيذ وطب ايه هو السر .....مش سر شويبس طبعا لا ....ده سر الراجل اللى واقف ورا عمر سليمان فى يوم التنحى وسر شباب الورد اللى فتح فى جناين مصر من الشهداء وسر الشباب اللى نضف الميدان التحرير بعد الثورة وسر الشباب اللى هيفضل مكمل المسيرة بعيدا عن مهطرات الاغبياء من الاسلاميين او السياسين فى مصر الشباب اللى هيبنى ويعمر .....الشباب اللى على رأى الخال الابنودى (طلع الشباب البديع وقلبوا خريفها ربيع ) ....سيبونا فى حالنا يا طيور الظلام يا قرود المصلحة والتنطيط فوق ظهر الاسد العرين ....احنا الشباب ربنا يخلينا لمصر ويخلى مصر لينا احنا الشباب ....ويجعله عامر والحدق يفهم